Rauf Əliyev: "21 yaşım yoxdur ki, belə anda həyəcanlanım"

"Neftçi"nin futbolçusu Rauf Əliyev Avropa Liqasının II təsnifat mərhələsində Rusiyanın "Arsenal" klubuna 3:0 hesabı ilə qalib gəldikləri oyundan sonra jurnalistlərin suallarını cavablandırıb.

Newsport.az-ın məlumatına görə, 30 yaşlı hücumçu öncə oyunu şərh edib:

- Nəticə gözlənilməz oldu. “Arsenal” kimi komandaya 3:0 hesablı qalib gəlmək çox yaxşı nəticədir. Əsas odur ki, mərhələni keçdik. Bizə inanmayancalara cavab oldu. Çox adam inanmırdı. Ruslar da inamırdı ki, “Neftçi” bu mərhələni keçər. Ancaq biz mərhələni adladıq, sevinirik.

- Komanda hansı hesaba oynayırdı?
- Əsas odur ki, turu keçək. Hər şey istədiyimiz kimi oldu.

- “Neftçi”nin ilk dəqiqələrdəki oyunu media mənsubları və azarkeşlərdə bir qədər inamsızlıq yaratmışdı. Bu, həyəcandan irəli gəlirdi?
- Gözləyirdik ki, “Arsenal” ilk dəqiqələrdən təzyiq edəcək. Rəqib də belə başladı. Ola bilər ki, azarkeşlərimiz önündə bir az həyəcanı ola bilərdi. Müəyyən top itkiləri olurdu. Ancaq əsas sonluqdur və biz də buna nail olduq.

- Rəqibin futbolçusu Gia Qriqalava ilk oyunda olduğu kimi, yenə də tez-tez mübahisələr edirdi. Sizi təxribata çəkirdi?
- Xeyr, əksinə idi. Mənimlə daha yaxşı idi. Yaxşı söhbətlər olurdu. Hər şey meydanda qaldı, biz qalib gəldik.

- Qol epizodunda soyuqqanlı davrandın. Həyəcanlı deyildin?
- 21 yaşımız yoxdur ki, belə anda həyəcanlanaq. Şükürlər olsun ki, hər şey yaxşı oldu, qol vurduq, komanda qalib gəldi. Uşaqlar meydanda yaxşı mübarizə apardı. Hər şey əla!

- Qol vurmamağın səni sıxırdı?
- Əlbəttə, istər-istəməz bunun təsiri olur. Hücumçusan və hər kəs səndən qol gözləyir. Bir az rahatlaşdım.

- Növbəti raundda rəqibiniz İsrailin “Bney Yehuda” klubu olacaq. Çoxları fikirləşir ki, bu komanda “Arsenal”dan daha zəifdir. Sizin fikirləriniz necədir?
- O qədər də məlumatımız yoxdur. “Arsenal”la oyunlara köklənmişdik. Yəqin ki, sabahdan maraqlanarıq. Bizi üçüncü mərhələdə gözləyirlərsə, bu da onların gücündən xəbər verir. Yəqin ki, məlumat toplayacağıq.

- Mərhələ keçdikcə inam artır. Qruplara düşəcəyinizə inamınız var?
- Yavaş-yavaş, mərhələ-mərhələ fikirləşsək, daha yaxşı olar. Qrup mərhələsini düşünmək də futbolçuya zərbə vura bilər. İsrail təmsilçisini fikirləşməliyik.

- “Neftçi”nin “Arsenal”ı məğlub etməsi Azərbaycan çempionatının Rusiya Premyer Liqası üzərində qələbəsi kimi adlandırmaq olar?
- Gəlin, bu çempionatları bir etməyək. Rusiya Premyer Liqasının səviyyəsi bəllidir. “Arsenal” Rusiyanın orta səviyyəli komandasıdır. Biz qalib gəldik, ancaq o demək deyil ki, “Neftçi” Rusiya çempionatından yüksəkdir. Əlimizdən gələni etdik, qalib gəlib, mərhələ adladıq. Hər şey əladır.





Xəbər lenti







Neftçi Qarabağ Qəbələ Sumqayıt Kəpəz Sabah Araz-Naxçıvan Səbail Turan Tovuz Zirə
Banner left
Banner right