"Bura gəlişimiz çox çətin oldu. Demək olar ki, bütün şəhəri gəzdik. 100 dəqiqə avtobusda olduq. Tez bir zamanda məşqə çıxmaq istəyirik. Səbirsizliklə, sabahki oyunu gözləyirik".
Newsport.az-ın məlumatına görə, bu sözləri Almaniyanın "Maynts" klubunun baş məşqçisi Martin Şmidt Avropa Liqasının C qrupunda keçiriləcək "Qəbələ" - "Maynts" oyunundan öncə təşkil olunmuş mətbuat konfransında deyib.
- Bu oyunda məqsəd yalnız qələbədi?
- Əlbəttə, evdə maksimum nəticə, səfərdə mümkün qədər çox xal toplamaq fəlsəfəsi qrupda keçərlidi. Ancaq ilk turda evdə xal itirdiyimizdən bu dəfə səfərdə 3 xalla itkini kompensasiya etməyə çalışacağıq.
- Onsuz da yaxşı olmayan ot örtüyünün vəziyyəti yağışlı havada məşq keçdikdən sonra daha da ağırlaşacaq. Bu, sizi narahat edirmi?
- Meydanı hələ görməmişəm. Məşqdə durumla tanış olacağıq. Bizim üçün çox çətin olacaq. Amma hər iki komanda üçün şərtlər eynidi. Çalışacağıq ki, oyunboyu tempi yüksək tutaq.
- Rəqibin zəif və güclü tərəfləri nələrdi? Sabah qalib gəlmək üçün nə etmək lazımdı?
- “Qəbələ”nin bir neçə oyununu izləmişik. Premyer-liqa və Avroliqadakı oyunları fərqlənir. Rəqibin nəyə qadir olduğunu, güclü və zəif tərəflərini bilirik. Bundan maksimum yararlanmağa çalışacağıq.
- Qrupda əsas rəqib kimi hansı komandanı görürsüz?
- Məncə ən güclü rəəqib “Sent-Etyen”di. Onları qrup birincisi kimi favorit görürəm. “Anderlext”, “Maynts-05” və “Qəbələ”nin şanslarını isə bərabər sayıram. Bu komandalar demək olar ki, eyni gücdədilər.
- Heyətlə bağlı narahatlıq varmı?
- Artıq komandanın kapitanı sıraya dönüb. 100 faiz oynamağa hazırdı. Gerrit Holtmann bir az xəstədi. Müəyyən rotasiyalara əl atacağıq. Dayaq yarımmüdafiəçiləriylə bağlı hər hansı problem yoxdu.