Konfrans Liqasının III təsnifat mərhələsi çərçivəsində avqustun 10-u saat 21:00-da "Neftçi Arena"da keçiriləcək “Neftçi” – “Beşiktaş” oyunundan əvvəl "ağ-qaralar"ın baş məşqçisi Adrian Mutu və futbolçu Filip Ozobiçin iştirakı ilə mətbuat konfransı təşkil olunacaq.

Newsport.az-ın məlumatına görə, tədbir avqustun 9-u saat 18:30-dan etibarən "Neftçi Arena"da keçiriləcək. Konfransdan sonra, saat 19:00-da isə komandanın media nümayəndələri üçün açıq məşqi (ilk 15 dəqiqəsi) baş tutacaq.

Eyni məkanda həmin gün saat 20:00-da “Beşiktaş”in baş məşqçisi Şenol Güneş və futbolçu Salih Uçanın iştirakı ilə mətbuat konfransı, 20:30-dan isə komandanın açıq məşqi (ilk 15 dəqiqəsi) olacaq.

Qeydiyyatdan keçmiş jurnalistlərə avqustun 9-u saat 12:00-dan etibarən “Neftçi Arena”da “Neftçi TV”nin ofisində oyun üçün akkreditasiyalar təqdim ediləcək.

Qeyd edək ki, hər iki komandanın mətbuat konfransı və açıq məşqinin “Neftçi TV” vasitəsilə canlı yayımlanması nəzərdə tutulub.