Newsport.az-ın məlumatına görə, Nyon şəhərindəki Kolovra stadionunda keçirilən qarşılaşmada 9 qol qeydə alınıb. "Barselona" rəqibini 5:4 hesabı ilə məğlub edib. İspaniya təmsilçisi bu nəticədən sonra finala adlayan tərəf olub.
Əliyar Ağayev bu matçda əlini 5 dəfə cibinə atıb. O, "Mançester Siti" və "Barselona"dan iki futbolçunu sarı vərəqə ilə cəzalandırıb. FİFA referimiz 36-cı dəqiqədə "şəhərlilər"in oyunçusuna qırmızı vərəqə göstərib.
Turnirin digər finalçısı "Çelsi" olub. "Portu" ilə əsas və əlavə vaxtı heç-heçə (2:2) nəticələnən matçın penaltilər seriyasında 5:4 hesabı ilə qalib gələn "zadəganlar" finala vəsiqə qazanıb. “Çelsi” Gənclər Liqasında “Qarabağ”la bir qrupda mübarizə aparıb, hər iki qarşılaşmada qalib gəlmişdi.
Qeyd edək ki, "Mançester Siti" - "Barselona" matçında Əliyar Ağayevin köməkçiləri Zeynal Zeynalov və Akif Əmirli olub. Dördüncü hakim funksiyasını Sandro Scharer (İsveçrə) yerinə yetirib.