Çempionlar Liqasının 2-ci təsnifat mərhələsinin ilk oyununda “Qarabağ”la qarşılaşacaq “Samtredia”nın baş məşqçisi Gia Tsetsadze oyundan öncə mətbuat konfransı keçirib.

Newsport.az saytının məlumatına görə, gürcü mütəxəssis jurnalistlərin suallarını cavablandırıb.

- “Samtredia”da futbolçular arasında ümumi əhval ruhiyyə necədi?
- Komandada hazırda hər şey yaxşıdı.

- Komandanın oyunundan razısız?
- Bəli, komandamın oyunundan razıyam. Bundan öncə də Bakıda oynamışdıq. Matça tam hazırıq.

- Ötən il “Qəbələ”yə 1:5 hesabıyla uduzmuşduz...
- Keçən ilkiylə müqayisədə komanda daha təcrübəlidi.

- Sabahkı oyunda qeydə alınacaq heç-heçə sizi qane edəcək?
- Bunu sabahkı oyundan sonra özünüz görəcəksiz. Fikrimcə, bizim üçün yaxşı oyun olacaq.

- Bizdə “Qarabağ”la “Qəbələ” həmişə müqayisə olunur. Sizcə, bu komandalardan hansı daha üstündü?
- Məncə, “Qarabağ” daha güclüdü.

- Komanda avrokubokda ev oyunlarını niyə Tiflisdə keçirir?
- Samtrediadakı arena standartlara cavab vermədiyindən, ev oyunlarımızı Tiflisdə keçiririk. Lakin “Dinamo-Arena”nı sırf mənim istəyimlə seçmişik.

- “Qarabağ”da hansı oyunçunu fərqləndirərdiz?
-  “Qarabağ” “Qəbələ”dən daha güclü komandadır. Komandanın ardıcıl 4 dəfə çempion olması da bunu sübut edir. Ümumiyyətlə, “Qarabağ”ın bir neçə oyununu izləmişik və bizə çətin olacağını düşünürük.

- Rəqib yoxlama oyunlarında məğlub olub...
- “Qarabağ”ın yoxlama oyunlarında məğlub olması rəqibin zəif olmasından xəbər vermir: “Qarabağ”ın yoxlama oyunlarının nəticəsi mənim üçün maraqlı deyil. Ümumiyyətlə, yoxlama oyunlarında qeydə alınan nəticə rəsmi oyunlara təsir etmir. Məncə, “Qarabağ” sabah öz oyununu meydana qoyacaq.