"Düdelanj"ın futbolçusu: "Beynimdə Azərbaycan haqda qəribə suallar yaranmır"

Kateqoriya: Çempionlar Liqası | Tarix: 13.07.2016 13:37

Çempionlar Liqasının II təsnifat mərhələsinin ilk oyunları çərçivəsində "Qarabağ” öz meydanında Lüksemburqun "Düdelanj” klubunu 2-0 hesabıyla məğlub edib. Matçdan sonra "Düdelanj”ın dayaq yarımmüdafiəçisi Rodriqe Dikaba müsahibə verib:

- Qarşılaşma haqqında nə deyə bilərsiniz?

- Fikrimcə, pis oynamadıq. Sözün düzü, real qol şansımız da olmadı. Amma rəqiblə başabaş mübarizə apardıq. "Qarabağ”ın güclü komanda olduğunu bilirdim. Buna meydanda bir daha əmin oldum. Bizi çətin cavab oyunu gözləyir.

- Cavab matçında şanslarınızı necə qiymətləndirirsiniz?

- Çox çətin olacaq. 3 cavabsız qol vurmaq asan məsələ deyil. Nəzərə almaq lazımdır ki, rəqibimiz "Qarabağ”dır. Rəqibimiz qarşısına Çempionlar Liqasının qrup mərhələsinə düşməyi hədəfləyən bir klubdur.

- İlk hissədə çox zəif çıxış etdiniz. "Qarabağ”ın hücumlarının qarşısını almaqda aciz görünürdünüz…

- Razıyam. Amma 2-ci hissədə cəsarətli oynadıq. İlk hissədə də yaxşı oynasaydıq, bəlkə də məğlub olmazdıq. Bu, futboldur. Məğlubiyyətimizi şişirtmək lazım deyil. "Qarabağ" bizdən adlı-sanlı komandadır. Bunu normal qarşılamaq lazımdır.

- Oyun başa çatan kimi Topmöller futbolçuları ətrafına topladı. O, sizə nə söylədi?

- O bizə cavab matçında inandığını söylədi. Futbolda hər şey mümkündür.

- Komanda yoldaşın Momar Ndiaye oyundan əvvəl bildirmişdi ki, Azərbaycan haqda düşünəndə beynimdə suallar yaranır. Bəs, sizdə necədir?

- Momarı deyə bilmərəm, amma mənim beynimdə Azərbaycan haqda qəribə suallar yaranmır. Şəhəriniz çox gözəl və müasirdir. Çox qonaqpərvər insanlarsınız. Futbolunuz da inkişaf edir.

Paylaş