"Kamranın karyerasını bitirmə qərarı bizim üçün gözlənilməz oldu"

“Səbail” komandasının baş məşqçisi Aftandil Hacıyev klubun rəsmi saytına açıqlama verib.

 

Newsport.az xəbər verir ki, Hacıyev, çempionatın növbəti mərhələsində hazır durumda olacaqlarını söyləyib:

 

“İki mərhələdən ibarət təlim-məşq toplanışına yanvarın 5-də “ASCO Arena”da başladıq. Yanvarın 10-dan isə toplanışın ikinci mərhələsinə “Dalğa Arena”da davam edirik. İlk mərhələ futbolçuların fiziki durumunun yüksəlməsinə hesablanmışdısa, ikinci mərhələdə texniki-taktiki çalışmalara üstünlük verilib. Bir yoxlama görüşü (“Səbail”-“Qarabağ-2”(0:0) artıq baş tutub. Bu gün növbəti yoxlama oyununda “Keşlə” komandası ilə qarşılaşacağıq. Yanvarın 21-i və 24-ü planlaşdırılmış daha iki oyun var. Təlim-məşq toplanışını yanvarın 24-ü başa vururuq. Çempionatın növbəti mərhələsində hazır durumda olacağıq”.

 

Aftandil Hacıyev bir neçə gün əvvəl karyerasını bitirən qapıçı Kamran Ağayevlə bağlı fikirlərini bildirib:

 

“Kamran Ağayevin bir il yarım bundan öncə futboldan kənar qalmasına razı deyildik. Onun hələ də futbolumuza qatqısı olacağını düşünürdük. Uzun prosesdən sonra geri qayıtmağı bacardı. Lakin, Kamranın karyerasını bitirmə qərarı bizim üçün gözlənilməz oldu. Davam etdiyi yolda ona uğurlar arzulayırıq. Bilirsiniz ki, qış fasiləsində oyunçu tapmaq çətindir. Xüsusilə də, hazırda qapıçı mövqeyi üçün sərbəst futbolçu yoxdur. Bundan sonra heyətimizi yerli futbolçular ilə gücləndirmək istəyirik. Bizim komandaya güc qata biləcək 2-3 futbolçu cəlb etməyi düşünürük. İstədiyimiz futbolçular hazırda qış fasiləsində sərbəst olmadığına görə ola bilər ki, çempionatı əlimizdə olan heyətlə davam edək”.

 

Hacıyev sonda adı “Qəbələ” və Yunanıstanın “Olimpiakos Volos” klubu ilə hallanan müdafiəçi Turan Manafovu komandada saxlamaq istədiklərini deyib:

 

“Klubumuza Turan Manafovla bağlı digər klublardan rəsmi təkliflər var. Onun gələcəyi üçün nəyin daha xeyirli olacağı barədə çox düşünürük. Bilirsiz ki, gənc futbolçudur və ilk dəfə legioner həyatı yaşayacaq. Klub olaraq, Turana sahib çıxmaq istəyirik. Həm hazırda bizimlə müqaviləsi var, həm də bilirsiz ki, Yunanıstana gedib bir çox problemlərlə üzləşən futbolçularımız da var. Bu kimi hallar baş verməsin deyə onu qoruyuruq. Hazırda danışıqlar gedir. Ola bilər ki, icarə əsasında çıxış etsin. Bu müddət ərzində həm biz, həm də özü prosesin necə irəlilədiyinin və necə inkişaf etdiyinin fərqində olaq. Yekun olaraq, Turanın keçidi ilə bağlı prosesdə ona xeyirli olacaq qərarı verəcəyik”.





Xəbər lenti







Keşlə Qarabağ Qəbələ Sumqayıt Neftçi Səbail Zirə Sabah