“Zirə”dən ayrılan futbolçu rəsmən “Səbail”də

Kateqoriya: Ölkə futbolu | Tarix: 01.02.2021 00:18

“Zirə”nin ötən gün yollarını ayırdığı müdafiəçi Ali Siseyin yeni klubu müəyyənləşib.

Newsport.az xəbər verir ki, Syerra-Leone yığmasının üzvü karyerasını Azərbaycanda davam etdirəcək.

Belə ki, 27 yaşlı mərkəz müdafiəçisi “Səbail”ə keçib. Bu barədə “dənizçilər”in mətbuat xidməti məlumat yayıb. Xəbərdə futbolçu ilə cari mövsümün sonadək müqavilə imzalandığı diqqətə çatdırılıb. Müdafiəçi yeni komandasında “4” nömrəli formanı geyinəcək.

Xatırladaq ki, Sisey ötən ilin qış fasiləsində keçdiyi "Zirə"də Rəşad Sadıqovun baş məşqçi postuna gəlişindən sonra əsas heyətə düşməkdə çətinlik çəkirdi.

“Səbail” Siseydən öncə gürcü hücumçu Luka İmnadzeni və Şimali Makedoniyadan olan yarımmüdafiəçi Milovan Petroviçi heyətinə qatmışdı.

Paylaş