Avrokubokların bu həftə keçirilən oyunlarından sonra klubların UEFA reytinqi açıqlanıb.
Newsport.az saytının məlumatına görə, siyahıda ümumilikdə 428 komanda yer alıb.
Azərbaycanın ən yaxşı təmsilçisi “Qarabağ” Avropada 65-cidir. Çempionlar Liqasında “Molde”yə penaltilər seriyasında uduzaraq Avropa Liqasına yuvarlanan Ağdam təmsilçisi 3 pillə geriləyib.
Qurban Qurbanovun yetirmələri “Milan” (İtaliya), “Standard” (Belçika) və “Styaua”nı (Rumıniya) özündən önə buraxıb.
Bu il avrokuboklarda oynamayan “Qəbələ”nin xal hesabı dəyişməyib. “Qırmızı-qaralar” 5,500 xala malikdir. 9 pillə geriləyən təmsilçimiz 191-199-cu yerləri bölüşür.
Avropa Liqasında “Qalatasaray”a (Türkiyə) 1:3 hesabı ilə məğlub olan “Neftçi” 6 pillə geriləyib. 5,000 xala malik bakılılar 218-224-cüdür.
2 pillə irəliləyən “Keşlə”, “Sumqayıt”, “Səbail”, “Zirə” və “Kəpəz” 3,250 xalla 301-308-ci yerlərə şərikdir.
Qeyd edək ki, reytinqə 111,000 xalla “Bavariya” (Almaniya) başçılıq edir.