Füzuli Məmmədov: "Ağıllı oynayıb qalib gəlməliyik"

Kateqoriya: Ölkə futbolu | Tarix: 10.08.2020 17:36

"Neftçi” PFK-nın baş məşqçisi Füzuli Məmmədov UEFA Avropa Liqasının birinci təsnifat mərhələsində püşkün nəticəsinə münasibət bildirib. Newsport.az xəbər verir ki, o, komandanın əsas üstünlüyünün evdə oynamaq olduğunu vurğulayıb:

"Hər bir rəqib təhlükəlidir. Düzdür, "Şkupi” kağız üzərində digər rəqiblərlə müqayisədə zəif görünə bilər. Amma əsas üstünlüyümüz odur ki, evdə oynayacağıq. Hər rəqib üçün xüsusi hazırlaşmaq lazımdır. Futbolçularımız bu oyuna tam köklənməlidirlər. Səhv etmək olmaz. Futbolçularımız sıxılmamalıdırlar, amma çox rahatlaşmaq da olmaz. Lazımi qədər həm diqqətli, həm də sərbəst olmalıyıq. Xüsusilə müdafiədə səhv etmək olmaz. Çünki mərhələnin taleyi bir oyundan ibarətdir. Təbii ki, hücum etməliyik, amma müdafiəni unutmamaq şərti ilə. Müdafiədə və ya mərkəzdə hər hansı səhv uğursuzluğa səbəb ola bilər. Ağıllı oynayıb qalib gəlməliyik”.

Qeyd edək ki, "Neftçi” – "Şkupi” (Şimali Makedoniya) oyunu avqustun 27-də "Bakcell Arena”da keçiriləcək.

Paylaş