Premyer Liqanın 16-cı turunda evdə "Sumqayıt"ı 1:0 hesabı ilə məğlub edən "Qarabağ"ın baş məşqçisi Qurban Qurbanov mətbuat konfransında jurnalistlərin sualları cavablandırıb.
Newsport.az-ın məlumatına görə, 48 yaşlı mütəxəssis öncə oyunu şərh edib:
- Gərgin oyun oldu. Hər iki komanda yaxşı futbol göstərdi. Vacib 3 xal qazandıq. Çempionatın hər oyunundan sonra digərinə daha ciddi yanaşmalı və diqqətli olmalıyıq. Futbolçularımı təbrik edirəm.
- Mahir Emreli iki sarı vərəqə ilə meydandan qovuldu. Sizə də çılğın reaksiya göstərdiz. Onunla söhbətiniz olacaq?
- Hər bir futbolçu ilə söhbətimiz olur. Orda baxmaq lazımdı ki, sarı vərəqələr var idi, ya yox. İlk epizodla bağlı fikrim yoxdu, ikincidə topa toxunmuşdu. Çox bəsit “sarı”lar oldu. Həmişə futbolçulara sarı vərəqələrə görə etiraz bildirmişəm. Hər oyunçu meydanda aqressiv olur. Bu dərəcədə sadə şəkildə vərəqə vermək olmaz. İdmanda bir az aqressiya normaldı. Mahirə etirazımı bildirdim ki, “sarı”n var idi, ehtiyac yox idi.
- “Sumqayıt” sizi nə iləsə təəccübləndirdi?
- Oyunlarımız həmişə gərgin keçir. Belə oyun gözləyirdik. İkinci hissədə daha rahat idik. Xeyli qol imkanımız oldu. “Sumqayıt” çempionatın ən yaxşı komandalarından biridi. Orda bir-birinə uyğun futbolçular toplaşıb. Ayxan müəllim sistemi oyunçulara görə qurub. Onların oyun üslubunu, futbolçuların potensialını bilirdik. Buna uyğun hazırlaşmışdıq. Oyundan oyuna daha təhlükəli “Sumqayıt” görürük.
- Ovusunun oyunu sizi qane edirmi?
- Normal idi. Bir neçə epizodda daha dəqiq oynaya bilərdi. Onun meydana çıxması sürəti artırdı. Bu, son dəqiqələrdə çox vacib idi. Sonradan meydana çıxan futbolçuda hər dəfə yaxşı alınmır. Amma özünü yaxşı tərəfdən göstərdi. Ona inanırıq. Qarşıdakı oyunlarda özünü daha yaxşı tərəfdən göstərəcəyini düşünürəm.
- Ramil Şeydayevin Azərbaycana qayıdışını necə qiymətləndirirsiz?
- Mənim üçün çətin sualdı. Hamımız istərdik ki, xaricdə oynayan futbolçularımızın sayı daha çox olsun. Bəzən situasiyaya görə belə addım atılır. Oyun praktikası çox vacibdi. Əvvəldən belə bir istəyi olsaydı, yanvarda dərhal gələrdi Azərbaycana. Yəqin bir neçə variantı olub, amma alınmayıb. Onun böyük potensialı var. İşgüzarlığına görə həmişə ondan razı qalmışıq. İnkişaf üçün oynamaq lazımdı, amma daha yüksək səviyyəli çempionatlarda çıxış etməsini istərdik. Düşünürəm ki, yaxın ətrafı dərindən fikirləşib və ən yaxşı qərarı veriblər.
- Yaş limiti oyunçuları ilə bağlı tez-tez rotasiyalar edirsiz. Bu, nə ilə bağlıdı?
- Daha çox rəqibə uyğun qərar veririk. Bundan başqa, hər bir futbolçuya oynamaq imkanı yaratmaq istəyirik. Bu, onların böyüməsi üçün imkan ola bilər. Gənclərimizin hər birinin böyük potensialı var. Onlara Rəşad Sadıqovun uşaqları deyirəm. Hamısını o tapıb. İmkanım olsa, hamısını meydana buraxaram. Amma birdən-birə belə etmək düzgün olmaz. İstərdim ki, gələcəkdə hamısı əsas komandanın futbolçusu olsun.
- Rəşad Sadıqovun milli komandaya məşqçi və ya baş məşqçi gedişi ilə bağlı söhbətlər var. Elxan Məmmədovla görüşdüyü deyilir. Fikriniz necədi?
- Bütün məlumatlar yazılıb. Təkliflərdən biri Rəşaddı. İctimaiyyət belə rəy bildirib. Düşünürəm ki, bu, elə-belə deyil. Onun futbolda qoyduğu iz, ona olan hörmət və inama görə belə rəy formalaşıb. Hər biri sağ olsun ki, gənc məşqçimizə belə inanırlar. Tək Rəşada yox, digər cavan məşqçilərimizə də inam var.
- Sizin Elxan Məmmədovla görüşünüz olub?
- Mən görüşməmişəm.
- Milli komandanın toplanışına az qalıb. Ancaq baş məşqçi hələ dəqiqləşməyib. İctimaiyyət sizin yığmaya qayıtmağınızı istəyir...
- Mən tam azadam. “Qarabağ”ın baş məşqçisiyəm.
