"Qarabağ"ın qapıçısı Asmir Beqoviç Premyer Liqanın 13-cü turunda "Sabah"a 1:0 hesabı ilə qalib gəldikləri oyundan sonra jurnalistlərin suallarını cavablandırıb.

Newsport.az-ın məlumatına görə, bosniyalı qapıçı öncə qələbəni şərh edib:

- Çətin oyun oldu. Komanda şəklində mübarizə apardıq. Bəxtimiz gətirsəydi, daha çox qol vuraraq, rahat qələbə qazana bilərdik. Baxımlı qol vurduq və vacib 3 xal əldə etdik.

- Uzun zaman sonra “Qarabağ”ın qələbə qazanması barədə fikirləriniz necədir?

- Sizinlə razıyam. Bu gün yaxşı mübarizə apardıq. Bir az da bəxt üzümüzə güldü.

- Hava şəraiti sizə çətinlik yaradırdı?

- Bəli, yağış, külək var idi ki, çətin oldu. “Sabah” yaxşı təşkilatlanmış komandadır. Bizə qarşı kompakt şəkildə oynadılar.

- Ötən cümə axşamı “Ramon Sançes Pisxuan”da “Sevilya”ya qarşı oynadınız, indi isə Masazırda “Sabah”la matçda meydanda oldunuz. Uyğunlaşmaq çətin olmur?

- Fərqli matçlardır. Hər oyun önəmlidir. Artıq liqaya köklənməliyik və qalib gəlməliyik.

- “Qarabağ”dan ayrılacağınız iddia edilir. Qışda komandadan gedəcəksiniz?

- Burada elə bir şey yoxdur. İcarə müqaviləm onsuz da yanvarın 1-nə kimi idi. Vaxt bitəndən sonra İngiltərəyə qayıdacam. “Qarabağ”da da uzun müddət qalmaq istəyərdim.

- “Qarabağ”da qalmaq istəyərdiniz?

- Təbii ki, qalmaq istəyərdim. Baş məşqçim, komanda yoldaşlarım yaxşı insanlardır. Bakı gözəl şəhərdir. "Qarabağ"da qalmaq istəyərdim, amma mənim istəyimdən asılı deyil. “Bornmut” və “Qarabağ” arasında olan məsələlərdir.