Hendrik Eksteyn: "Şanslardan yaxşı istifadə etsək, çempionluğa da oynaya bilərik"

“Sabah”ın vingeri Hendrik Eksteyn Premyer Liqanın birinci turunda “Neftçi” ilə 1:1 hesablı heç-heçə etdikləri oyundan sonra müsahibə verib.
 
Newsport.az xəbər verir ki, 27 yaşlı cənubi afrikalı futbolçu öncə oyunla bağlı danışıb:
 
- Həmişə üç xal haqqında düşünürük. Çətin görüş oldu, “Neftçi” güclü rəqibdir. Bir xal götürmək normal nəticə sayılmalıdır.
 
- İki topunuz dirəkdən döndü. Hesabı ədalətli sayırsınız?
- Deyə bilərəm ki, hərdən belə olur, qol şansları yaradırsan, amma dirək və tir buna mane olur. Bu, bəxtsizlikdir. 1:1 hesabı pis nəticə deyil.
 
- “Sabah” çempionluğa oynaya bilər?
- Məncə, biz UEFA zonasını da düşünə bilərik. Təbii ki, hər oyunda şanslardan yaxşı istifadə etsək, çempionluğa da oynaya bilərik.
 
- “Kayzer Çifs” kimi məşhur klubdan “Sabah”a niyə gəlmisiniz?
- Hər dəfə məkanı dəyişmək gözəldir, indi Azərbaycandayam. Mənə də maraqlı gəlir. Yeni macəradır.
 
- Adınız daha əvvəl “Qarabağ”la da hallanıb. Bu söhbətlər həqiqət idi?
- “Qarabağ”dan yox, “Səbail”dən maraqlanıb, təklif göndərmişdilər.
 
- “Səbail”in təklifini niyə qəbul etmədiniz?
- Əvvəlcə “Səbail”dən təklif almışdım. Qorxdum, bilmirdim hara və niyə gedirəm. “Sabah”dan təklif alandan sonra isə “Qarabağ”ın keçmiş hücumçusu Dino Ndlovudan məlumat aldım. Azərbaycanı çox təriflədi. Qərara gəldim ki, “Sabah”a keçməliyəm.
 
- Azərbaycanda oynaya-oynaya Cənubi Afrika Respublikasının milli komandasına dəvət almaq mümkündür?
- Məncə, onlardan zəng ala bilərəm. Çünki xaricdə oynayanlarla maraqlanırlar. Buranın çempionatı kifayət qədər normal səviyyədədir. Niyə də yox?! Mən ümidliyəm ki, dəvət gələcək.




Xəbər lenti







Keşlə Qarabağ Qəbələ Sumqayıt Neftçi Səbail Zirə Sabah