“AB Standard” QSC-yə daxil olan, eləcə də bu holdinqlə əlaqəli 7 şirkət ləğv olunduğunu elan edib.

Newsport.az-ın məlumatına görə, söhbət “AB Trading”, “AB Travel”, “AB Skybell”, “Masalt”, “Avto Şop”, MMC-lərdən, eləcə də “AB Service” firmasından gedir. 

Siyahıda 2010-cu ildə fəaliyyətini dayandırmış “Standard Futbol Klubu” da var.

Böyükağa Hacıyevin dönəmində Premyer Liqada sonuncu yeri tutan komanda I Divizionda çıxış etmək istəmədi. “Standard“ın həmin vaxt Sumqayıtı təmsil etməsini xatırladaq.

Kreditorlar 2 ay ərzində tələblərini Bakı şəhəri, Nəsimi rayonu, Səməd Vurğun küçəsi, ev 25, mənzil 54 ünvanına bildirə bilərlər.

“AB Standard” şirkətlər qrupu 2002-ci ildə yaradılıb. Bu holdinqə ləğv prosesində olan “Bank Standard” QSC, fəaliyyətdə olan “Standard Insurance” Sığorta Şirkəti ASC, Standard Lizinq MMC, qiymətli kağızlar bazarındakı yeni qaydalarla əlaqədar fəaliyyətini dondurmuş “Standard Kapital” MMC daxildir. Şirkətlər qrupunun sahibi sabiq iqtisadi inkişaf naziri Heydər Babayev və onun ailə üzvləridi.

Bir müddət əvvəl Babayevlər “Standard Insurance”ın rəhbərliyindən uzaqlaşdırılıb. Sığorta şirkətinin Direktorlar Şurasının sədri Babayev Rəhman Əlifağa oğlu vəzifədən gedib.

Onu bu vəzifədə Məmmədov Nicat Məhərrəm oğlu əvəz edib. Həmçinin Heydərov Oruc Heydər oğlu və “Standard“FK-nın prezidenti Babayev Emin Heydər oğlu Direktorlar Şurasının üzvlüyündən çıxarılıb.

1997-ci ildən Rusiyadakı “Mostbank”ın vitse-prezidenti, həmin bankın Böyük Britaniyada baş nümayəndəsi vəzifələrində işləyən Heydər Babayev 1999-cu ildə Prezident yanında Qiymətli Kağızlar üzrə Dövlət Komitəsinin sədri vəzifəsinə təyin olunmuşdu.

Və o, 2005-ci ilin oktyabrınadək bu vəzifədə çalışdı. Vəzifədə olduğu müddətdə qeyri-rəsmi şəkildə həm də bizneslə məşğul olan Heydər Babayev “ABU” şirkətlər qrupunu yaratmışdı.

2005-ci il oktyabrın 19-da Heydər Babayev prezident İlham Əliyev tərəfindən yeni vəzifəyə - iqtisadi inkişaf naziri postuna təyin olundu.

Amma cənab Babayev bu nazirlikdə çox işləyə bilmədi. 2008-ci il oktyabrın 30-da Heydər Babayev iqtisadi inkişaf naziri vəzifəsindən azad olundu.

2016-cı ilin sentyabrında ölkənin ən iri banklarından olan “Bank Standart” ASC-nin lisenziyası ləğv edilib.

“Bank Standart” sabiq iqtisadi-inkişaf nazirinin rəhbərlik etdiyi “AB Standart” Holdinqə daxil idi. 

Holdinqin tərkibində  “Bank Standard” QSC, “Standard İnsurance” MMC, “AB Legal Consulting Group” MMC, “Standard Lizinq” MMC, “Standard Capital” MMC, “Standard Football Club” MMC, “Dərngül boru zavodu” və “Lənkəran Mehmanxana” a da vardı. 

“Standard” Futbol Klubu isə 2006-cı ildə Bakı şəhərində yaradılıb. Bu komanda Azərbaycan çempionatının elitasında iştirak edib.

Daha sonra “Standard Bakı” adlandırılıb. 2009/10 mövsümünün yekunlarına əsasən komanda 1-ci Divizyona düşdü.

Lakin 2010-cu ildə  «Standard» 1-ci Divizyonda iştirakdan imtina etdi, futbolçulara azad agent statusu verildi.

Yəni “Standard Football Club” MMC çoxdan fəaliyyətsiz idi və bu ləğvetmə yalnız faktın fiksiyasıdı. 

Artıq neçə illərdir ki, H.Babayevin bütün əmlakını satıb ölkədən getmək istədiyi barədə iddialar yayılır.

Bildirilirdi  ki, H.Babayevin özünün 100 milyon manatdan çox borcu var ki,  bura “Standard Bank”ın müştərilərinə olan borcu daxil deyil.

sportinfo.az