Millimizin sabiq üzvü döyülməsindən danışdı

Azərbaycan millisinin sabiq futbolçusu Saşa Yunisoğlu naməlum şəxslər tərəfindən döyülməsinə aydınlıq gətirib.

Newsport.az xəbər verir ki, 34 yaşlı keçmiş müdafiəçi bu barədə sosial şəbəkə hesabında yazıb. 

Yunisoğlu hadisənin evinin yaxınlığında baş verdiyini bildirib:

“Təəssüflər olsun ki, haqqımda yayılan son xəbərlər hardasa, doğrudu. Hadisə belə olub. Şənbə günü, axşam saatlarında yaşadığım evin yaxınlığındakı mağazadan alış-veriş etmək üçün maşını saxladım. Park etdikdən sonra maşından düşüb kurtkamı geyinmək istəyərkən iki nəfər mənim yanımdan keçirdi. Qaranlıq olduğundan, sifətlərini görmədim. Biri mənə nəsə dedi və yanımdan maşınımın yanına keçdi, o biri isə qarşımda dayandı. Bu vaxt boynumdan küt bir zərbə hiss etdim. Səndələdim, geri dönmək istədikdə isə qarşımda dayanan mənə tərəf təpik atdı və əlimdəki pul kisəsini əlimdən qapmağa çalışdı. Mən də müqavimət göstərməyə çalışdım. Bu vaxt bizə tərəf gələn bir maşının işıqları üstümüzə düşüncə hərəsi bir tərəfə qaçıb uzaqlaşdılar. Ciddi bir xəsarət almadım, heç bir yerə müraciət etmədim və heç kəsdən də şikayətçi olmadım. Nə etmək olar, həyatdı. Arayıb maraqlandıqları üçün hər kəsə minnətdarlığımı bildirirəm. Ümid edirəm ki, bir də belə şeylər başıma gəlməz, inşallah! Çünki cəmiyyətimizdə idmançılara qarşı bir qarşılıqlı hörmət var”.

Yunisoğlu Azərbaycan millisinin heyətində 28 oyun keçirib. O, “Neftçi”, “Bakılı”, “MTK-Araz”, “Bakı”, “Qəbələ”, AZAL, “Sumqayıt”, “Rəvan”, “Araz Naxçıvan”, “Səbail”, “Diskoboliya”, “Poloniya” (hər ikisi Polşa) və Türkiyənin “Dənizlispor” klublarında çıxış edib.

 

 





Xəbər lenti







Keşlə Qarabağ Qəbələ Sumqayıt Neftçi Səbail Zirə Sabah