AÇ-2020-nin seçmə məhələsinin ilk oyunları çərçivəsində millimiz Xorvatiyanın qonağı olacaq.
Newsport.az-ın verdiyi məlumata görə, yığmamızın baş məşqçisi Nikola Yurçeviç oyundan öncə təşkil edilən mətbuat konfransında jurnalistlərin suallarını cavablandırıb. 52 yaşlı mütəxəssis öncə oyunla bağlı düşüncələrini bölüşüb:
- Qarşımızda güclü komanda durub, çətin oyun olacaq. Ancaq hazırlaşmışıq və yaxşı oyuna ümid edirik. Xorvatiya səviyyə baxımından bizi üstələyir, ancaq futbolda hər şey mümkündür. Xorvatiya dünya çempionatında 2-ci yeri tutmuş komandadır. Start heyətlə bağlı bəzi şübhələrim qalıb. 14 nəfər arasında 11-lik seçəcəm. Az sonra məşqimiz olacaq və son qərarlarımı qəbul edəcəm.
- Zaqrebə rəqib komandanın baş məşqçisi kimi gəlmək necə hissdir?
- Əlbəttə, qəribə hisslərdir. Ancaq Azərbaycan yığmasını çalışdırdığım üçün qürur duyuram. İnanıram ki, vətənimdə uğurlu debüt olacaq.
- Dostlarınızla görüşməyə imkan tapa bildiniz?
- Yalnız qızımla görüşmüşəm. Ümid edirəm ki, sabah dostlarım məni salamlayacaq. Ailəm mənim yanımda olacaq və bizi dəstəkləyəcək. Dostlarımı isə bilmirəm (gülür).
- Azərbaycan Xorvatiyanı hansı cəhətlə təəccübləndirə bilər?
- Xorvatiya böyük yarışlarda həmişə möhtəşəm oynayır. Ancaq kiçik komandalarla seçmə mərhələ oyunlarda problemlər yaşayıblar. Bu da daha böyük üstünlüyümüz ola bilər.
Sportske Novosti