2020-ci ildə keçiriləcək dünya çempionatının ilkin və əsas mərhələsinin püşkü atılıb. Newsport.az xəbər verir ki, millimiz üçüncü qrupda Slovakiya, ilkin mərhələnin H qrupunun qalibi və G qrupunun ikincisi ilə qarşılaşacaq.
Milli komandada 2015-ci ildə Slovakiyaya qarşı keçirilmiş oyunda debüt edən Rövşən Hüseynli azfutzal.az saytına püşkü dəyərləndirib: “Püşkatmanı izlədim. Hələ ki bir rəqibimiz dəqiqləşib. Slovakiya ilə artıq qarşılaşmışıq. 2015-ci ilin sentyabrında keçirilmiş oyunlardan Bakıda 3:1 hesabı ilə qələbə qazandıq, səfərdə isə 1:1 hesablı heç-heçə etdik. Bu komandanın karyeramda xüsusi yeri var. Çünki milli komandada debütüm məhz bu komanda ilə matçda baş tutdu. Qeyd etdiyim kimi, Bakıdakı oyunda qələbə qazansaq da, oyun kifayət qədər çətin keçdi. Ancaq milli karyerama qələbə ilə başlamağımın ayrı yeri var. Digər rəqiblərimiz ilkin mərhələdən vəsiqə qazanacaq. H qrupunun qalibi, G qrupunun ikincisi ilə gücümüzü sınayacağıq”.
Qolkiper kağız üzərində favorit olsaq belə, tələsməməyi vurğulayıb: “Ümumi dəyərləndirmə aparsaq, püşk tərəfimizdədi. Reytinqi, iştirak etdiyimiz yarışları, rəqiblərimizi göz önünə gətirdikdə, əlbəttə, qrupun aşkar favoriti hesab edilirik. Ancaq bu aysberqin üzdə olan tərəfidi. Futzal sürətlə inkişa edir. Son illərdə qeydə alınan nəticələr də bunu göstərir. Ona görə də suallara meydanda aydınlıq gətiriləcək”.
Millinin qapıçısı ilkin mərhələdən əsas mərhələyə yüksəlmək ehtimalı olan komandalarla bağlı proqnozunu da açıqlayıb: “Moldova millisini favorit hesab edirəm. Həm də bu komanda bizə tanışdı. Ancaq son illərdə Finlandiya yığması da inkişafdadı. Məncə, ilk iki yer uğrunda mübarizə bu komandalar arasında gedəcək. Digər qrupda isə Hollandiya yığması aşkar favoritdi. Ancaq istisna da ola bilər. Onlar ikinci yerlə vəsiqə qazansalar, bizim üçün yad rəqib olmayacaqlar. Dünya çempionatının pley-off mərhələsində məhz onlarla qarşılaşmışdıq. Səfərdə 5:1 hesabı ilə məğlub etdiyimiz hollandlarla Bakıda 4:4 hesablı heç-heçə etmişdik. Estoniyanı da unutmaq olmaz. Ümumiyyətlə, Hollandiyanı çıxsaq, digər 3 komanda güc baxımından bir-birinə yaxındırlar”.
Millimizin “dişinə” uyğun rəqiblər olduğunu deyən Hüseynli əsas mərhələ ilə işləri yekunlaşdırmaq haqda deyil, Litvaya vəsiqə qazanmağı düşündüklərini də əlavə edib: “Rəqiblərimiz “dişimizə” uyğun komandalardı. Ancaq əsas mərhələ ilə kifayətlənmək istəmirik. Əsas işimiz elit-raunda da olacaq. Reqlamentə uyğun olaraq elit-raundun qalibləri birbaşa final, ikinci yeri tutan millilər isə play-off oyunlarına vəsiqə qazanacaqlar”.
