Bu gün Azərbaycan Premyer Liqada VII turdan təxirə salınmış oyun keçiriləcək.
Newsport.az-ın məlumatına görə, "ASK Arena"dakı qarşılaşmada "Keşlə" və "Qarabağ" komandaları üz-üzə gələcəklər. Son turda "Neftçi"yə, ondan əvvəl isə Avropa Liqasının qrup mərhələsində Bakıda "Vorskla"ya uduzan Ağdam klubu 2 oyunluq qələbə həsrətinə məhz paytaxt təmsilçisi ilə matçda son qoymaq niyyətindədir. Qurban Qurbanovun komandası səfərdə "Keşlə"ni məğlub etməklə, lider "Neftçi" ilə xal fərqini 3-ə endirmək istəyir.
"Keşlə" isə "Qarabağ"la oyuna təyinatı dünən gerçəkləşən Tərlan Əhmədovun rəhbərliyi altında çıxacaq. Ötən tur "Səbail"ə 1:2 hesablı məğlubiyyətdən sonra Mladen Milinkoviçlə yollarını ayıran Bakı klubu yeni baş məşqçisi ilə ilk matçda maksimum nəticə qazanmağa çalışacaq.
Qeyd edək ki, oyun saat 19:00-da başlayacaq.
Azərbaycan Premyer Liqası
VII turdan təxirə salınmış oyun
31 oktyabr
19:00. "Keşlə" - "Qarabağ" 1:1
Qollar: Sərtan Taşkın, 88 - Miçel, 56
Hakimlər: Rəhim Həsənov, Yaşar Abbasov, Elşad Abdullayev, Mahir Məmmədov
"ASK Arena"