"Sabah"ın baş məşqçisi Elşad Əhmədov Azərbaycan Premyer  Liqasının 8-ci turunda "Sumqayıt"a səfərdə 1:0 hesabı ilə qalib gəldikləri matçdan sonra mətbuat konfransı keçirib.

Newsport.az-ın məlumatına görə, təcrübəli mütəxəssis əvvəlcə qarşılaşmanı dəyərləndirib.

- Oyunun gərgin keçəcəyini gözləyirdik. Rəqib hardasa ikinci hissədə bizi üstələdi. Hərçənd, azlıqda oynayırdı. Nazim Süleymanov yaxşı komanda qurub. Futbolçularımız xarakter, mübarizlik göstərdilər və qələbə qazandılar. Buna görə onları təbrik edirəm.

- Rəqibin üstünlüyü 60-cı dəqiqədən sonra özünü göstərdi. Komandada yorğunluq, hərəkətsizlik vardı. Bu, nə ilə bağlı idi?

- Qarşılaşmadan öncə məndən soruşmuşdular ki, futbolçularınız revanşa görə özlərini yandıra bilərlər. Onlarda bu həyəcan vardı ki, qol buraxmasınlar.

- Aldığınız 4 sarı vərəqə də bunun nəticəsi idi?

- Bu da revanş hissi ilə bağlı oldu. Çox sarı vərəqə aldıq.
 
- Vurğun Hüseynov olmasaydı, "Sumqayıt" daha üstün oynayardı. Bunu düşündünüzmü?

- Elə düşünmürəm. 11-11-ə oynasaydıq, futbolçularımız daha maraqlı oynayırdılar.

- Bəxtiyar Soltanov ötən mövsüm "Xəzər"də I divizionda komandanızın kapitanı, lideri idi. Ancaq indi sonradan meydana girir, qaça bilmir. Doğrudanmı, çempionatlara arasında səviyyə fərqi belə böyükdür, yoxsa problem futbolçudadır?

- Bu iki liqa arasında səviyyə fərqi həqiqətən böyükdür. Bəxtiyarı özüm tanıya bilmədim, bir neçə epizodda Yusif Nəbiyevi necə üstələyə bilmədi. Halbuki, Soltanov sürətli futbolçudur, bundan faydalana bilmədi (sportnet.az).