Transfer çalışmalarını davam etdirən “Neftçi” daha bir keçidi rəsmiləşdirib.

Newsport.az klubun rəsmi saytına istinadən xəbər verir ki, qanalı futbolçu Kvame Karikari ilə 2 il müddətinə müqavilə imzalanıb. 26 yaşlı hücumçu komandanın 11 nömrəli formasını geyinəcək.

Sonuncu klubu "Əl Ərəbi” (Qətər) olan Kvame Karikari Qananın "İnternational Ellies”, İsveçin AİK, "Deqerfors”, "Halmstad”, Türkiyənin "Balıkesirspor”, Norveçin "Hauqesund”, Ukraynanın "Stal”, Qətərin "Əl Marhiya” və Qananın gənclərdən ibarət milli komandasında çıxış edib.

Qeyd edək ki, "Neftçi” bundan əvvəl cinah müdafiəçisi Tural Axundov, mərkəz müdafiəçisi Slavko Braliç, yarımmüdafiəçilər – Rəşad Eyubov, Qoran Paratski, hücumçular – Dario Frederiko və Baqali Dabonun keçidini rəsmiləşdirmişdi.