"Maraqlı oyun alındı. Komandaların ifasında yardıcı futbolun şahidi olduq. Hər iki tərəf topa nəzarət etmək istəyirdi. Nəticə yaxşıdır. Heyətimizdə çoxlu gənc futbolçular var. Qazaxıstanla bizim hədəflərimiz fərqlidir. Onlar qrupda 2-ci yer uğrunda mübarizə aparırlar. Biz isə komandanı yeniləmək istəyirik".
Newsport.az-ın "sports.kz" saytına istinadən yaydığı xəbərə görə, bu sözləri Qazaxıstanın 21 yaşadək futbolçularından ibarət yığması ilə yoldaşlıq oyunundan (1:1) sonra keçirilən mətbuat konfransında U-21 millimizin baş məşqçisi Rəşad Sadıqov deyib. Qarşılaşma ilə bağlı fikirlərini açıqlayan gənc mütəxəssis daha sonra jurnalistlərin suallarını cavablandırıb.
- Sizcə, hakimin penalti qərarı nə dərəcədə doğru idi?
- Nəyisə detalları ilə şərh edə bilmərəm. Görmək istədiyimizi meydanda tətbiq edə bildik. Oyundan razıyam. Mənim üçün nəticə ikinci planda idi.
- Qazaxıstan millisi sizdə hansı təəssüratları oyatdı?
- Yaxşı komandanız var. Sizə azarkeşlik edəcəyik. Qazaxıstanda futbolun inkişafı məndə yaxşı təəssüratlar oyatdı. "Astana"nın uğurları da bunu sübut edir. Düşünürəm ki, düzgün yoldasınız.
- "Astana"nın yeni baş məşqçisi Roman Qriqorçuk haqda nə bilirsiniz?
- Maraqlı insan və yaxşı məşqçidir. Onunla mübarizə aparmaq maraqlı idi. Qriqorçuka uğurlar arzu edirəm.