"Hakimliklə bağlı əleyhimizə çox qərarlar olub" - Roman Qriqorçuk

Azərbaycan Premyer Liqasının 26-cı turunda evdə “Keşlə” ilə bərabərə qalan (1:1) “Qəbələ”nin baş məşqçisi Roman Qriqorçuk oyunsonrası mətbuat konfransında jurnalistlərin suallarını cavablandırıb.

Newsport.az-ın məlumatına görə, ukraynalı mütəxəssis əvvəlcə oyunla bağlı fikirlərini bildirib:

- Yaxşı oyun alındı. Oyunumuzu bir az da inkişaf etdirməliyik. Əldə etdiyimiz qol fürsətlərini dəyərləndirməliyik. Xüsusilə, ilk hissədə yaxşı imkanlarımız oldu. Bu cür fürsətlərdən yararlansaq, daha yaxşı nəticələr qazana bilərik. Ancaq dediyim kimi, bu matçı çempionatdakı ən yaxşı oyunlardan biri kimi dəyərləndirərdim.

- Bu gün rəqib sizin komandanın üzvlərinə qarşı bir qədər kobud oynayırdı. Siz də hakimlərə qarşı aqressiv görünürdüz...
- Hakim nə qədər icazə verirsə, kobudluq da o qədər çox olur. Mən burda olduğum zaman hakimliklə bağlı əleyhimizə çox qərarlar olub. Futbolçularımın siması hələ də gözümün önündədi. Məsələn, Qay və digər futbolçular üzümə baxıb, sanki kömək istəyirdilər. Ancaq dediyim kimi, hakimliklə bağlı edəcək bir şey yoxdu.

- Ölkə kubokunun finalında üz-üzə gələcəyiniz rəqiblə qarşılaşmada bütün kartlarınızı açdız?
- Bu gün yaxşı oynadıq. Son vaxtlar komandamız kifayət qədər yaxşı oynayır. Bu matça çıxanda, kubok oyunu barədə düşünməmişdik. Kuboka kimi hər iki komandanın iki oyunu var. Öz oyunumuzu inkişaf etdirməyə çalışırıq. Bu gün də, sadəcə, öz oyunumuza köklənmişdik.

 

 





Xəbər lenti







Keşlə Qarabağ Qəbələ Sumqayıt Neftçi Səbail Zirə Kəpəz