“Sürətli, yaxşı oyun oldu”.

Newsport.az xəbər verir ki, bu sözləri “Sumqayıt”ın məşqçisi Seymur Rəhimov deyib.

“Kimyaçılar” Azərbaycan Kubokunun yarımfinal mərhələsinin cavab oyunları çərçivəsində öz meydanında “Keşlə”ni qəbul edib. Görüş 1:1 hesablı bərabərliklə başa çatıb. Bu nəticədən sonra “Keşlə” finala adlayan tərəf olub.

Oyundan sonra baş tutan mətbuat konfransında iştirak edən mütəxəssis fikirlərini bildirib: “Rəqibi təbrik edirəm, bizdən çox istəkli idilər. Bundan başqa, uşaqların üzərində təsir var. Amma bunları bəhanə etmək istəmirəm, rəqib bu gün bizdən çox istəkli idi”.

- Mehdi Cənnətov topu oyuna gec daxil edirdi. Bunun səbəbi nə idi?

- Bu gün Mehdiyə şəns verməyi qərara aldıq. Bəli, bu gün gecikirdi, bu fikirlə razıyam. Qalib gəlmək istəyən komanda belə futbol oynamazdı. Dediyim kimi, çox zəif çıxış etdik.

- “Sumqayıt”da qələbə ruhu yox idi. Bunun səbəbi nə idi?

- Daha tez qol vursaydıq, oyun başqa cür olacaqdı. Dediyim kimi, “Keşlə” çox istəkli idi. Onların belə oynayacağını gözləyirdik.  

- Komanda mövsüm ərzində Amil Yunanovdan asılı olur və bunun acısını çəkirsiniz. Bu fikirlə razısınız?

- Amilə inanırıq, ümidlərimiz böyükdü. Qışda bacardığımız qədər transfer etməyə çalışdıq. Amil öz balamızdı, irəliyə baxmaq lazımdı.

- Rəqib baş məşqçi oyunun gedişində xoşagəlməz hərəkət etdi. Buna münasibətiniz necədir?

- Bu, aqressivlikdən olur. Bu, hər bir baş məşqçinin başına gələ bilər. (Futbol11.az)