"Kəpəz"in baş məşqçisi Yunis Hüseynov Azərbaycan Premyer Liqanın 20-ci turunda səfərdə "Sumqayıt"a 1:2 hesabı ilə məğlub olduqları oyundan sonra mətbuat konfransı keçirib.
Newsport.az-ın məlumatına görə, təcrübəli mütəxəssis əvvəlcə matç haqda fikirlərini bölüşüb.
- İlk növbədə "Sumqayıt"ı təbrik edirəm. Qalib gəlmək istəyirdik. Komandamız pis təsir bağışlamadı. İlk hissədə yaxşı oynadıq. İkinci hissədə oyunu rəqibə verdik. Onlar isə iki zərbə vurdu və qol oldu.
- Uğursuzluq sindromunu nə ilə bağlayırsınız?
- Psixoloji cəhətdən ola bilər. Həmişə ikinci hissənin sonlarında qol buraxırıq. Ona görə səhvlər olur.
- Dario Federiko sanki süni meydançada özünü qoruyurdu...
- Dario texnikalı oyunçudur. Rəqib də bunu bildiyi üçün ona yaxın oynayırdı. Ona görə də oyunu alınmadı. Yəni, süni meydança olduğu üçün deyil.
- "Kəpəz"dən kiminsə milliyə çağrılacağını gözləyirsiniz?
- Bəlkə də autsayder olduğumuz üçün heç kimi çağırmaz. Amma bu, Qurban müəllimin səlahiyyətindədir. Özü necə məsləhət bilsə, elə də edəcək (sport24).