“Zirə” klubunun fəxri prezidenti Orxan Məmmədov “Kiçik və Orta Sahibkarlığın İnkişafı Agentliyi”nə icraçı direktor təyin olunub. İqtisadiyyat Nazirliyinin tabeliyindəki “Kiçik və Orta Sahibkarlığın İnkişafı Agentliyi” Azərbaycan Respublikasının Prezidenti İlham Əliyevin 28 dekabr tarixli fərmanı ilə yaradılıb.

Newsport.az saytının məlumatına görə, yeni vəzifəyə təyin olunan Orxan Məmmədov 1984-cü ildə iyulun 1-də Bakı şəhərində anadan olub. 2005-ci ildə Bakı Dövlət Universitetinin Beynəlxalq münasibətlər fakültəsini bitirib. 2009-cu ildə Odlar Yurdu Universitetinin Biznes administrasiyası üzrə magistr dərəcəsini alıb. 2012-ci ildə Azərbaycan Dövlət İqtisad Universitetində Maliyyə və Kredit üzrə ikinci təhsilini bitirib.

Məmmədov əmək fəaliyyətinə 2006-ci ildən Sənaye və Energetika nazirliyində başlamış, 2007-ci ildən İqtisadiyyat nazirliyin Sahibkarlığın inkişafı siyasəti və Dövlətlərarası iqtisadi əməkdaşlıq şöbələrində baş məsləhətçi, müdir müavini və müdir vəzifələrində çalışıb.