"Bugünki oyunda şükürlər olsun ki, hər şey qaydasında getdi. İstədiyimiz o idi ki, ən azı bir qol vuraq. Lakin bir olmadı, iki oldu. İkinci hissədə də istəyirdik daha da yaxşı oynayaq, qol vuraq. Çünki 2-0 sürüşkən hesabdır. Hər zaman hər şey ola bilərdi. Önəmli olan mərhələni keçmək idi. Bundan sonra daha yaxşı hazırlaşacayıq".
Newsport.az xəbər verir ki, bu sözləri "Neftçi" - "Zirə" matçından sonra (2-0) "ağ-qaralar"ın kapitanı Ruslan Abışov stadiona ezam olunmuş əməkdaşımızın suallarını cavablandırarkən bildirib.
-Aqressiyalı oynayırdız...
-Sözssüz ki, biz artıq neçə oyundur “Zirə”ni məğlub edə bilmirdik. Həm azarkeşlərin basqısı, həm də öz istəyimiz var idi. Mənə elə gəlir ki, bu qələbə tam yerinə düşdü.
-Qələbəni sanki finalda qalib gəlmişcəsinə qeyd etdiniz.
-Düzdür, “Zirə” üzərində qələbə bizim üçün böyük əhəmiyyət kəsb edir. Sanki bu komandaya qarşı tilsim var idi. Bu gün də özümüzə söz vermişdik ki, bu tilsimi qıracağıq.
-Çoxdandır azarkeşlərlə bu cür bütövlük yaratmamışdınız. Buzlar əriyib demək olar?
-Bizim azarkeşlər hər zaman yanımızdadırlar. Onlarla heç vaxt problemimiz olmayıb. Müəyyən vaxtlarda küskünlük olmuşdu. Artıq hər şey keçmişdə qalıb.
-Dəfələrlə sizi mix-zonaya dəvət etmişik gəlməmisiz. Bu nə ilə bağlıdır?
-Ola bilər oyundan sonra kefim olmayıb. Nəticə yaxşı olmayıb deyə gəlməmişəm. Futbolçu da insandır. Üzürlü sayın bu normaldır.