Bu gün Azərbaycan kubokunda 1/4 final mərhələsinin oyunlarına start veriləcək. 

Newsport.az-ın məlumatına görə, ilk olaraq, Premyer Liqanın autsayderləri "Keşlə" və "Kəpəz" münasibətlərinə aydınlıq gətirəcək. Mövsümün gedişində baş məşqçisini dəyişən və çempionatda işləri yolunda getməyən komandalar yarımfinala adlamaq üçün əla imkan əldə ediblər. Çünki hər iki klub bir-birinə münasib rəqib gözü ilə baxır.

Mərhələnin bu gün baş tutacaq digər oyunu Zirədə reallaşacaq. Yerli komanda doğma azarkeşləri önündə "Neftçi"ni qəbul edəcək. Premyer Liqada işləri qaydasında gedən “Zirə”dən fərqli, “Neftçi” üçün kubokda sona qədər irəliləmək daha önəmlidi. Qış fasiləsinə 6-cı pillədə yollanan "ağ-qaralar" Avropa Liqasına vəsiqə şansını riskə atmamaq üçün ilk olaraq “Zirə”ni mübarizədən kənarlaşdırmalıdı. Ayxan Abbasovun komandası isə növbəti mərhələyə adlamaq üçün "Neftçi"ni ilk oyunda məğlub etməyə çalışacaq.